Ikoranabuhanga mu kubungabunga ibidukikije

Ikoranabuhanga mw’itumanaho ryibanda ku gukoresha Telefone, interineti byifashisha ahanini ibyogajuru n’ibindi bikoresho bigezweho byagize uruhare runini mu kurinda iyangirika ry’ibidukikije by’umwihariko amashyamba yatemwaga kugirango haboneke ibikoresho by’ibanze mu gukora impapuro zo gukoresha mu buzima bwa buri munsi.

Mbere y’umwaduko w’abazungu mu Rwanda no mu bindi bihugu byinshi bya Afurika byakoreshaga itumanaho ryo mu magambo gusa abatumanaho bihuriye cyangwa batumye abandi, ukeretse ibibihugu nka Misiri yatangiye kwandika mu bihe bya kera.

Muri icyo gihe wasangaga ibihugu byinshi bya Afurika bigizwe n’amashyamba y’inzitane, ababituye bakabonera imvura kugihe, ikirere kimeze neza, inyamanswa zororoka n’ibindi byiza byinshi bikomoka ku mashyamba.

Mu gihe cy’ubukoroni na nyuma yaho ibihugu byinshi bya Afurika aharimo n’u Rwanda byakoreshaga kenshi impapuro, itumanaho ry’umunwa ku wundi by’umwihariko ariko akenshi itumanaho ryakoreshaga ibintu bifati byanditseho.

Kuva aho Afurika itangiriye gukoronizwa haje uburyo bushya bwo gutumatumanaho, kubika amabanga ya leta n’ay’ibigo bitandukanye hakoreshejwe impapuro.

Kuri ubu kuberako ikorana buhanga mw’itumanaho rikataje, ikoreshwa ry’impapuro riragenda ricika, himakazwa gukoresha za mudasobwa mu kubika no kwandika inyandiko zitandukanye, ndetse interineti na telefone mugutumatumanaho.

Muri iki gihe Leta zitandukanye zo muri Afurika zibinyujije mu bigo byazo bishinzwe ikoranabuhanga na za Minisiteri zibishinzwe, barakangurira abaturage b’ibihugu byabo gukoresha ikoranabuhanga mu buzima bwabo bwa buri munsi, mu Rwanda amabanki ni bimwe mu bigo bimaze kubyuma neza .

Iyo tuvuze uruhare rw’itumanaho mu kwangiza ibidukikije by’umwihariko amashyamba, ntiwasiga ibijyanye n’ubwikorezi bw’abantu n’ibintu nabwo byagiye bugira uruhare mw’iyangizwa ry’ibidukikije(amashyamba) hacibwa imihanda, za gare, amasitasiyo y’ibikomoka kuri peteroli n’amasitasiyo y’ibiti mu gihe hari hagikoreshwa za gariyamoshi akoresha umuriro ukomoka ku ngiga z’ibiti n’ibindi byose byakorwaga hagamijwe kunoza itumatumanaho ry’ibihugu, uturere n’ibindi.

Muri gahunda z’icyerekezo cy’ikinyagihumbi (MDGs) y’umuryango w’abibumbye kurengera ibidukikije harimo amashyamba ni imwe mu ntego z’iki cyerekezo.

Urubuga rwa wikipedia rugaragaza ko byibura hegitari miliyoni 13 kumwaka zishiraho ibiti, ahanini kubera ibikorwa bya muntu harimo gusaha aho batura, aho guhinga, ibiti n’imbabyo gucana cyangwa kohereza mu nganda n’ibindi.

Vénuste KAMANZI/ibiriho.com