Amashyuza azatanga ingufu z’amashanyarazi

Amashyuza azatanga ingufu z’amashanyarazi azaba yikubye inshuro zirindwi ayari asanzwe akoreshwa mu gihugu yanganaga na megawati 111,3, aya mashyuza azacukurwa ahantu hasaga hane.

Umuyobozi w’Ikigo cy’Igihugu gishyinzwe ingufu, amazi, isuku n’isukura EWSA Muyange Yves, yatangaje ko aya mashyuza azacukurwa mu duce turimo Rubavu, Kinigi na Bugarama. Biteganyijwe ko azatangira gutunganywa umwaka utaha wa 2013.

Mu kiganiro mbwirwaruhame n’Abanyarwanda bo mu mpande zitandukanye z’Igihugu cyanyuze kuri Radiyo na Televiziyo by’u Rwanda kuwa 28 Ukwakira, Muyange yatangaje ko kuri ubu inyigo zakozwe, hakaba hari kugenzurwa neza uburyo hazacukurwa aya mashyuza akabyazwa umusaruro.

Muyange yavuze ko ubusanzwe mu gihugu hose ingufu z’amashanyarazi zikoreshwa zituruka ku ngomero zitandukanye, zirimo urwa Rusizi ya kabiri ikunze kugira ikibazo cy’imashini eshatu rukoresha zishaje, narwo ubwarwo rukaba rushaje kuko rwubatse mu mwaka w’1981 kugeza ubu rukaba rutaravugururwa, bityo uru rugomero rukunda kwivana ku murongo bigatuma uduce tumwe turimo Amajyepfo tubura umuriro w’amashanyarazi ndetse n'ahandi mu gihugu nk'uko bamwe mu Banyarwanda bakomeza kwibaza impamvu z'iryo bura aho  basobanurirwa ko kuri ubu EWSA inifashisha urugomero rwa Mukungwa rukunganira izindi mu gihe habayeho ikibazo cy’ingufu z’amashanyarazi.

Yatangaje ko hari n’izindi ngufu ziteganyijwe kuzabyazwa amashyanyarazi zirimo imirasire y’izuba na Nyiramugengeri, n’izindi ngomero zitandukanye.

Source:Igihe.com